Podemoseko Garbiñe Ruizek bere hautagaitza proposatu du Gasteizko alkatetzarako

Udalerako (Garbiñe Ruiz) eta Aldundirako (David Rodriguez) hautagaiak. / PODEMOS

Batzar Nagusietan egiten ari den lanarekin jarraitu nahi du David Rodriguezek ere.

Gasteizko Udaleko eta Batzar Nagusietako Podemosen egungo bozeramaileek, Garbiñe Ruizek eta David Rodriguezek, gaur aurkeztu dituzte Podemosen primarioetarako hautagaitzak. "Legegintzaldi honetan zehar bi erakundeetan egiten ari diren lanarekin jarraitu nahi dute, herritar guztiak babestuko dituen hiri eta lurralde eredua lortzeko, eta are gehiago egungo krisi larrian aldaketa desiratua baita", azaldu dute ohar batean. "Gizarte gehiengoen alde eta gizarte bidezkoago, berdinzaleago, feministago eta ekologistago baten alde egiten ari dira lan". Bat Egin Podemos proiektuarekin aurkeztu dira biak. Proiektu irekia da, azaldu dutenez, "eta integratzailea, herritarrei hiri eta lurralde eredu bidezkoagoa eta aurrerakoiagoa eskaini nahi diena". 

Garbiñe Ruiz 39 urteko gasteiztarra da, Arte Ederretan lizentziatu zen Euskal Herriko Unibertsitatean (EHU), eta Arte Garaikidearen kontserbazioan eta zaharberritzean espezializatu zen. Hainbat urtez Euskadiko kultura- eta museo-arloko erakunde ezagunekin lankidetzan aritu ondoren, Ruizek osasun-adarrerako norabidea aldatu zuen, eta Radio Diagnostikoko eta Medikuntza Nuklearreko teknikari gisa graduatu zen. Hara itzultzea aurreikusten du, politikaren etapa amaitutakoan.

Zortzi urte dira Gasteizko Podemoseko militantzian parte hartzearen aldeko apustua egin zuela, lau Gasteizko Udalean zinegotzi modura. Gaur egun, Podemos Euskadiko zuzendaritzako kide da, eta bertan Kulturako arduradun eta Feminismo eta LGTBIko idazkari da. "Gasteizek potentziala du, udalerri askorentzat adibide izaten jarrai dezake eta jarraitu behar du, eta atzean geratzen ari gara. Gasteizek ongizate-estatua indartzea izan behar du helburu, eta pertsonek berek izan behar dute garrantzitsuena. Gasteizko Udalak herritarren konfiantza eta gaur egun funtzionatzen ezduen parte-hartze eredua berreskuratu behar ditu", azaldu du Ruizek.

David Rodriguez

David Rodriguez, aldiz, Arabako landa-eremuan bizi da; Arabako arkitekto kolegiatua, hirigintzako eta lurralde jasangarrietako masterra du. Arkitekturan, etxebizitzan, birgaitzean, plangintzan, gizarte eta kultura-azpiegituretan, ur-azpiegituretan eta saneamendu-azpiegituretan lan egin du, baita klima-aldaketaren ondorioak arintzeko proiektuetan eta hondamendi naturalek kaltetutako eremuak berreraikitzeko proiektuetan ere, garapen-bidean dauden herrialdeetan.

Arabako Podemosen sortzaileetako bat izan zen 2014an, eta gaur egun Elkarrekin Podemos IUko bozeramailea da Arabako Batzar Nagusietan, baita Euskadiko Podemosen Etxebizitza eta Hirigintza Saileko arduraduna ere. Bere hautagaitzak, besteak beste, Arabako lehen sektorea "irmo" babestuko duen eredu bat defendatzen duela azaldu du: "Tokiko elikagaien ekoizpena, osasungarria eta eskuragarria, eta tokiko merkaturatzea indartuko dituena, Baserritik Mahaira estrategiari jarraituz, eta agroekologia eta nekazaritza birsortzailea modu erabakigarrian bultzatuko dituena. Era berean, herri-hiri mugikortasun jasangarriari bultzada handia eman behar dela azpimarratu du, "herrietan biztanleak finkatzeko eta hirian auto kutsatzaileen sarrera murrizteko, bai eta garraio publikoak arrazoizko prezioa izatearen aldeko apustua egiteko ere". 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide