Tutoretzapeko adingabe batek hezitzaile baten sexu abusuak salatu ditu

Erredakzioa 2022ko ira. 20a, 20:30
Gazteak joan den astean salatu zituen abuztu hasierako erasoak. / ALEA

Arabako Aldundiaren zentro batean hezitzaile baten aldetik jasandako sexu abusuak salatu ditu tutoretzapeko neska adingabe batek. Enpresak begiralea baztertu eta kaleratzeko espedientea zabaldu dio.

EITBk argitaratu duenez, Arabako Aldundiak kudeatutako zentro batean tutoretzapean den neska adingabe batek begirale baten aurkako salaketa jarri du sexu abusuengatik. Ustez, gertakariak abuztuaren hasieran jazo ziren, eta gazteak joan den astean jarri zuen salaketa, Ertzaintzaren aurrean.

Beste hezitzaile batek eta zentroko zuzendariak lagundu zuten salaketa jartzera. Gainera, gertakarien berri izan bezain pronto, zentroa kudeatzen duen enpresak ustezko erasotzailea baztertu egin zuen, baita kaleratzeko espedientea abiatu ere; une honetan, espedientea ebazpenaren zain dago.

Bitartean, Ertzaintzak ikerketa burutu ostean, Gasteizko epaitegi batek hezitzailearen aurkako izapideak abiatu ditu.

Bere aldetik, Aldundiak bere gain hartu du adingabea babesteko eginbeharra, eta auzian pertsonatuko da ikerbidea abiatzen denean.

Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide