Olatz Perez de Viñasprek jasoko du II. Gladys Saria. 1987an jaio zen gasteiztarra, eta, bere ibilbide akademikoari dagokionez, sistemen informatikan ingeniari teknikoa eta informatikan ingeniaria da; EHUko Informatika Fakultatean burutu zituen ikasketak. Ondoren, Hizkuntzaren Azterketa eta Prozesamenduko (HAP) masterra egin zuen, 2011 eta 2013 urteen artean. 2017an, Hizkuntzaren Azterketa eta Prozesamendua doktoretza programa bukatu zuen, Euskal Herriko Unibertsitateko Informatika Fakultatean, Donostian.
Epaimahaiak aho batez hartu du erabakia, "bere ibilbide akademiko oparoa eta gizarte erronka handiei erantzuteko egiten duen lana" azpimarratuz.
Gaur egun irakasle atxikia da Perez de Viñaspre, EHUko Informatika Fakultateko Konputagailuen Arkitektura eta Teknologia sailean, eta ikerketa munduan ere dihardu. Besteak beste, nabarmentzekoa da Euskarazko Tesien VI. Koldo Mitxelena Sarietan, 2018an, Ingeniaritza eta Arkitekturaren jakintza-arloko saria jaso zuela. Horrez gain, I. Ikergazte Nazioarteko Ikerketa Euskaraz kongresuan Udalbiltzak banatutako Sari Berezia eman zioten, Euskal Herriko garapenerako bereziki garrantzitsua den gaia lantzeagatik.
Gladys Sariaren bigarren edizioa Puntueus Fundazioak eta EHUko Informatika Fakultateak antolatu dute, Gipuzkoako Aldundiaren babesarekin eta EHUko Berdintasun Zuzendaritzaren laguntzarekin. Aitortza honek ingurune digitalean ari diren emakume gazte euskaldunak saritu, gazteentzat erreferenteak sortu eta egiten duten lana jendarteratzea du helburu, Gladys del Estal informatikaria gogoratzearekin batera.
Sari banaketa eta ekitaldia irailaren 27an izango da, 11:00etan EHUko Informatika Fakultatean, Donostian.