Larunbat honetan EAJren Gasteizko egoitzaren aurrean egindako elkarretaratzean, Arabako Mendiak Aske plataformak salatu du Ingurumen Administrazioaren Legeari —"Tapia Legea"— beste aldaketa bat egingo zaiola.
"Lege horrek, ingurumen eragina duen edozein proiekturen baimen eskumenak gobernuan zentralizatzen ditu jada, eta, hala, beren lurraldeetako herri lurren gaineko eskumena duten udalak eta kontzejuak salbuesten ditu", kritikatu dute. "Eusko Jaurlaritzak, tokiko gobernantza kanpo uztearekin aski ez eta, orain, are gehiago urratzen du gobernuak berak lehentasunezko izendatutako proiektuek ingurumenean eragiten dituzten kalteak ebaluatzeko gaitasuna, ez baita beharrezkoa ingurumen-inpaktuaren ebaluazioa. Hau, diotenez, lurraldea pribatizatzeko orain arte planteatutako proiektuak arin izapidetzea lortzeko omen".
"Ezin dugu onartu salbuespen-egoera hori", ohartarazi dute. "Izapide hori alde batera utzi nahi bada, aurreikusitako proiektu horiek berez geldituko liratekeelako da, ez bailukete gaindituko ingurumen-inpaktuaren ebaluazioa. Gure salaketak beti izan dira aurreikusitako kokapenetan zentral horiek eragingo luketen eragin itzulezinak eragindakoak".