Urriaren 1etik azaroaren 27ra bitartean, 47. edizioa ospatuko du Gasteizko Antzerki Jaialdiak. Guztira 34 ikuskizun izango dira, euskal konpainienak eta nazioartekoak, horietako 5 estreinaldiak estatuan. Besteak beste, Javier Camara, Irene Escolar, Aitziber Agirre eta Miguel Rellan aktoreak izango dira taula gainean, Pascal Rambert, Peter Brook, Sergio Peris Mencheta, Pablo Remon edota Daniel Veronese antzerkigileen lanekin.
Ekitaldia aurkezteko prentsaurrekoan Estibaliz Canto Gasteizko Hezkuntza eta Kultura zinegotziak, Marta Monfort Udal Antzerki Sareko zuzendariak eta Aitziber Atorrasagasti Eusko Jaurlaritzako Kultura Sustatzeko zuzendariak hartu dute parte. "Gasteizko 47. Nazioarteko Antzerki Jaialdiak bere distira berreskuratu nahi du, eta gure publikoari ilusioa itzuli nahi diogu, arte eszenikoez maila gorenean gozatzeko, hizkuntza berriak deskubritzen jarraitzeko, edukiera osoetara itzultzeko, artistekin eta ohiko espazioekin elkartzeko", iragarri du Estibaliz Canto kultura zinegotziak.
Horretarako, nazioarteko hainbat proposamen izango ditu, hala nola Peter Brook ahaztezinaren eta omenduaren Tempest Project, Familie Flozen Feste, Carolyn Carlson koreografo ospetsuaren The Tree, eta Atterballeto dantza-konpainiaren Don Juan, besteak beste. Espainia, Suitza, Alemania, Frantzia, Herbehereak eta Italiako lanak ikusi ahal izango dira, besteak beste.
Abonua eskuratu nahi dutenek irailaren 15etik 18ra bitartean egin ahal izango dute, ohiko bideetatik. Irailaren 20an abonu irekiak erosi ahal izango dira (aldez aurretik hitzordua eskatuta) eta 22an sarreren aldez aurreko salmenta hasiko da.
EGITARAU OSOA