Mendiko hektarea bat erre da Gaubean, larunbat gauean, Karanka herritik bostehun metrora sortutako sute batean. Gasteizko udalerrian, Otogoien eta Otobarren artean, berriz, igande arratsaldean piztu da sua, zereal lursail batean, herritik oso gertu.
Karankako sutearen kasuan, inguruko bizilagunek suhiltzaileei eta 112 zenbakira egindako deiei esker, sua itzaltzeko neurriak berehala hartu ahal izan ziren. Deia jaso eta hamabost minutura, Arabako Foru Suhiltzaileen kamioiak herrian ziren, eta ordu erdi batean sutea kontrolatuta zuten. Uzta makina batek sortu zuen sua, eta kalteak izan dira inguruko mendi txiki batean.
Otogoieneko kasuan, sua herritik oso gertu piztu zen. Suhiltzaileak, nekazariak eta gainerako bizilagunak lanean aritu ziren sugarrak herriko baserrietara eta BordaBerri jatetxera irits ez zitezen, bertako terrazatik sugarrak oso gertu baitzeuden.