Beroaldiak bere horretan dirau, eta asteburuan ez du menia emango: datozen hiru egunotan hodei gutxi eta bero asko espero dira. Gasteizen gaur 16 eta 32 gradu arteko aldea espero da, eta, hurrenez hurren, 18-34 eta 19-35 artekoak larunbatean eta igandean. Ohi bezala, Arabako Errioxan espero dira tenperatura altuenak, eta bertan 40 gradutara iritsiko dela aurreikusi dute.
Hortaz, alerta laranja mantendu du Euskalmetek datozen 48 orduetarako, tenperatura altuak eta baso sute arriskuagatik. Asteburuan zehar haize ahula ibiliko bada ere, larunbat arratsaldean tarte biziak izan ditzake. Horrek giroa zerbait freskatzen lagundu dezakeen arren, jakina da suteak sortzen direnean haizea ez dela batere aliatu ona. Epe luzerako aurreikuspenek asteartean aldaketa etor daitekeela diote, euriarekin, eta, hala izatekotan, asteazkenean tenperaturak dezente jaitsiko lirateke, 23 graduko maximoekin.