Lainoa izango dugu ostiral honen hasieran, eta hodei batzuk egongo dira, baina arratsalderako zeru garbiak izango ditugu. Ipar osagaiko haize ahul-bizia izango dugu nagusi, baina arratsaldean indartsuago jo dezake. Tenperaturak 10 eta 23 gradu artean ibiliko dira gaur, Gasteiz inguruetan bederen.
Asteburuari begira, antzeko iragarpena egin du Euskalmetek. Goizean goiz lanbroa agertuko da zenbait lekutan, baina gehienbat oskarbi mantenduko da zerua larunbatean zein igandean. Azken egunotako joerari jarraiki, haizea arratsaldez indartuko da. Tenperatura maximoek nabarmen egingo dute gora, eta 30 graduren bueltan gera daitezke, batez ere hegoaldean.