Iritsi da udako kirol egutegian markatutako data garrantzitsu bat: denboraldi berrian Alavesek etxeko partidak jokatzeko erabiliko duen kamisetaren aurkezpena. Aurten hasita, datozen lau denboraldietan Arabako taldearen ekipazioaren hornitzaile ofiziala Puma izango da.
2022/2023 denboraldian, iaz atzean utzitako tradizioa berreskuratuko du Alavesek: marra txuri-urdinak. Are gehiago, 2013/2014 denboraldian adina marra izango ditu aurtengo kamisetak. Alavesen armarria bordatuta joango da, eta ikurrina jokalarien lepoaren atzealdean mantenduko da. Horrez gain, galtzek eta galtzerdiek beltzak izaten jarraituko dute.
Ekipazio berriak Puma kirol enpresaren DryCell teknologia baliatuko du, kirolarien gorputz tenperatura egokia mantentzen laguntzeko. Teknologia horrek ehun konbentzional batek baino denbora gehiagoz uxatzen ditu hezetasuna eta izerdia; horrek errendimendua handiagoa izaten laguntzen du, baldintza fisikoak bere horretan askoz denbora gehiagoz mantenduta.
Aurresalmenta
Kamiseten aurresalmenta martxan da dagoeneko, 75 eurotan (69,90 euro junior eredua), eta Alavesen denda fisikoetan zein online dendan. Uztailaren 13tik aurrera eskuragarri egongo dira.