Aurtengoa hogeigarren aldia izango da Espainiako Vuelta txirrindularitza lasterketa Arabako hiriburutik abiatzen dela; azkena duela bi urte, 2020an. Abuztuaren 23an izango da, Gasteiz eta Guardia artean 153,5 kilometro egingo dituen laugarren etapan.
Erdi mailako etapa izango da, bi mendaterekin: Opakua, 2. kategoriakoa, eta, helmugatik 15 kilometrora, Herrera, 3. kategoriakoa. Bidean, Etxaguen, Legutio, Landa, Ozeta, Narbaxa, Done Bikendi Harana, Arraia-Maeztu, Kanpezu eta Bernedo herriak zeharkatuko dituzte. Gainera, aurten hurbiltzen diren zaleentzako Fan Zone bat jarriko dute Bastidako kiroldegiko aparkalekuan, udal igerilekuen ondoan.
Arabatik igarotzeaz gain, Vueltak ordezkaritza arabarra izango du ere, Mikel Landa txirrindulari zuiarraren eskutik. Lasterketa abuztuaren 19an hasiko da, eta Utrecht, Bolduque eta Breda (Herbehereak) zeharkatu ondoren iritsiko da gure lurraldera. Irailaren 11n amaituko da Madrilen, 3.280 kilometro eta 38 mendate gainditu ostean.
"Apustu argia eta irmoa"
Etaparen aurkezpenean izan dira gaur Gasteizko alkate Gorka Urtaran, Arabako diputatu nagusi Ramiro Gonzalez, Guardiako alkate Raul Garcia eta Vueltako zuzendari Javier Guillen.
Urtaranek albistea ospatu du, "bizikletaren erabilera" bultzatu eta hiriaren "sustapen ekonomikoa" ekarriko duelako. Vueltaren antolakuntzak hiru gau igaroko ditu Gasteizen, eta horrek 750.000 eta 975.000 euro arteko itzulkin ekonomikoa suposatuko du, alkatearen arabera. Bere aldetik, diputatu nagusiak nabarmendu du Aldundiak Vuelta ekartzearen aldeko "apustu argia eta irmoa" egin duela legegintzaldi honetan, baita etorkizunera begira ere.