Abisu horia mantendu du Euskalmetek gaurkorako zein biharko, "muturreko temperatura [sic] oso altuak" direla-eta. Termometroak gaur 37 gradutara eta bihar 38 gradutara hel daitezke. Minimoak ere ez dira larregi joango beherantz: 16-17 gradutan ibiliko da giroa.
Gainerakoan, bi egunetan oso agertoki antzekoa izango dugu, ia-ia kalkatuta: eguzkia nagusi, goi hodeiekin zipriztinduta. Arratsaldeetan bero hodeiak sor daitezke, eta horiek ura bota dezakete, ekaitz edo zaparrada trumoitsu gisa. Ordu horien bueltan haizeak ipar osagaia hartuko du, eta, ohi bezala, ekaitz aurreko uneetan bereziki zakartu daiteke.