Manuel Iradier Txangolari Elkarteak, Vital Fundazioaren laguntzarekin, Gasteizko Mendiak probaren XIII. edizioa antolatu du larunbat honetarako, ekainaren 11rako. Goizeko seietan hasiko da fondo handiko mendi lasterketa ezaguna, eta 63 kilometroko zirkuitua izango du Uribarri Jauregi herritik Gasteizeraino; hiriburuan, Cervantes etorbidean amaituko da proba.
Itxogana, Indiagana, Arraialde, Almurrain, Kapildui, Zalbizkar, Lendiz, Arrieta, Zaldiaran, Busto eta Ezkibel izango dira lasterkariek gainditu beharko dituzten gailurrak; horietako batzuetan pasabide kontrolak ezarriko dira. Guztira, 5.816 metroko desnibel metatua izango du ibilbideak (2.848 metroko igoera eta 2.968 metroko jaitsiera), eta lasterketa osatzeko azken ordua 20:00ak izango dira.
1.098 pertsonak eman dute izena aurten (916 gizonek eta 182 emakumek), eta guztien artean 1.000 plaza esleitu dira zozketa bidez. Ibilbidea osatzen duten lehen 100 lagunek automatikoki lortuko dute dortsal bat 2023ko Hiru Haundiak lasterketarako, eta antolatzaileek beste 100 zozkatuko dituzte gainerako parte-hartzaileen artean.
Larunbateko 05:00etan, lasterketa hasi baino ordubete lehenago, hainbat autobusek eramango dituzte abiapunturaino, Gasteizko Mendizabaleko aparkalekutik. Gainera, 150 boluntariok baino gehiagok lagunduko dute lasterketaren logistika lanetan.