Artium museoan bilduta dauden artelanek 46.985.043 euro balio dute. Horrela balioetsita daude arte lanen gordailuaren aseguru poliza kontratatzeko Arabako Foru Aldundiak atera duen azken lizitazioan. Balioespen hori Arabako museoen artean handiena da; alde handiz, gainera. Orotara, foru sareko museoen %63 suposatzen du horrek.
Gasteizko Gotzaindegiarekin batera kudeatutako Arte Sakratuaren museoa da bigarrena, alde ekonomikoari dagokionez bederen: 12.119.204 euroko balioa emango zaio aseguru polizan. Sailkapen horretan doaz ondoren Fournier museoa (5.218.625), Arkeologia museoa (3.315.026), Arte Ederren museoa (3.189.954) eta Armagintza museoa (1.455.013). Azkenik, Puente Altoko foru biltegian gordetako lanei 1.818.971 euroko balioa eman diete foru arduradunek.
Guztiak batuta, foru sareko artelanek 74 milioi euro balio dute, agiriaren arabera. Artelanak aseguratzeko kontratua egiteko 110.000 euro bideratuko ditu diputazioak, BEZik gabe.