Giroko etaparik gogorrenetarikoa izan zuten atzokoan, eta Landak sailkapenean gora egiten jarraitzeko indarrak badituela erakutsi zuen berriz ere. 200 kilometro baino gehiago, 5 ordu eta 40 minutu eta aurtengo Giroko mendaterik gogorrenetarikoak gainditu ostean, pelotoia ia erabat desagertzeraino murriztu zen helmugan. Santa Cristinako azken igoeran portuan gainera murgiarrak taldekideak lanean jarri zituen eta erritmo gogorrari esker Carapaz liderra eta Hindley bakarrik izan ziren gai Landarekin batera aurrera egiteko. Aurretik sartu ziren helmugan eguneko ihesaldi jendetsuari eustea lortu zuten txirrindulari bakarrak, Jan Hirtek etapako garailea eta bigarren helmugaratu zen Arensman.
Sailkapen nagusirako lehian, Almeidak helmugan segundu batzuk galdu bazituen ere, momentuz, podiumeko postuari eustea lortu zuen. Hamabost segundura dauka Landak orain hirugarren postua, eta maglia arrosa berriz 59 segundura.