Lau greba egunen ostean, lehen hitzarmena lortu dute Aernnova Engineering enpresan

Aernnova Engineering enpresako langileen mobilizazio bat, Miñaon. / Argazkia: ELA

Apirileko eta maiatzeko greba zikloaren ostean, lehen enpresa hitzarmena sinatu dute Aernnovako ingeniarien dibisioan: akordioak soldata igoerak, lanaldi murrizketa, telelaneko eskubideak eta lan erreformen aurkako blindajea jasotzen ditu.

Greba ziklo baten osteko beste akordio bat Arabako industrian, oraingoan AEDn (Aernnova Engineering Division) enpresan. Apirilaren 5ean eta 7an lau orduko lanuzteak egin zituzten, eta maiatzaren 3an, 5ean, 10ean eta 12an lau greba egun; ondoren, greba mugagabearen hotsak entzuten hasi ziren, baina azkenean akordioa erdietsi du enpresa batzordeak —ELA sindikatuaren gehiengoarekin— zuzendaritzarekin.

Horrela, aplikatzen ari zen Ingeniaritzen Estatuko Hitzarmena atzean utzi eta lehen aldiz enpresa hitzarmena izango dute Miñaoko 140 langileek. "Urteetako planifikazioa, bilera asko eta greba egun batzuk egin dira, eta negoziazio gogor baten ondoren hobekuntza garrantzitsuak lortu dira", azpimarratu du ELA sindikatuak.

Hitzarmen berriak hainbat hobekuntza ekarriko ditu: soldata igoerak —KPIari lotutakoa plantilla osoarentzat, soldaten parekatzea, kolektibo prekarioenentzako igoera lineala eta helburuen ordainsaria—, lanaldi murrizketa —16 ordu urteko hitzarmenaren indarraldiko (2022-2025) azken urterako—, deskonexio digitaleko zein telelaneko eskubideak, eta lan erreformen aurkako blindaje-klausulak.

ELAk "positibotzat" jo du akordioa: "Hobekuntza horiek are garrantzitsuagoak dira kontuan hartzen bada Aernnovak urteak daramatzala baldintzak eta eskubideak murrizteko apustu sendoa egiten. Langileak kalera atera dira, etorkizunean aurrera egiten jarraitzeko oinarriak ezartzen dituen akordio hau lortu arte", nabarmendu du sindikatuak.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide