Blockhaus mendate gogorrak eman dio ongietorria aurtengo Giroko lehen mendi etapa garrantzitsuari, eta sailkapenean aldeak zabaltzeko lehen aukera izan dute txirrindulariek. Etapa ikusgarria eta bizia, sasoiko ez dauden horiek atzean uzteko balio izan duena.
Igoera gogorrean taldea txikitzen joan da, lehenik Ineos taldearen erritmo biziak eraginda, eta ondoren faboritoen erasoei esker. Igoera osoan zehar Richard Carapaz, Romain Bardet eta Mikel Landa izan dira. Halere ez dute alde handirik zabaltzerik lortu eta azken kilometroetan, maldak apaldu ahala, atzetik zetozen beste faboritoek aurreko hirurekin bat egitea lortu dute.
Talde txikia iritsi da helmugara, eta horien artean azken metroetan bizkorrena Jai Hindley australiarra izan da, Landa berriz laugarrena, Bardet eta Caparazen atzetik.
We're just getting started 🔥
— Giro d'Italia (@giroditalia) May 15, 2022
... e siamo solo all'inizio 🔥
... y sólo estamos al principio 🔥
... et ce n'est que le début 🔥#Giro pic.twitter.com/NgrZjn7SJN
Faboritoen lehia
Juanpe Lopez gazteak, helmugan denbora galdu duen arren, maglia larrosari eusteko aukera izan du eta asteleheneko atseden jardunaldian sailkapeneko lehen postuan jarraituko du. Faboritoen zerrenda argitu egin da eta Simon Yates, Kelderman, Carthy eta beste asko lehiatik kanpo geratu dira dagoeneko. Mikel Landa zazpigarren dago sailkapen nagusian, 29 segunduko atzerapenarekin. Bestetik, Pello Bilbaok, eroriko gogorra jasan duen arren, helmugan denbora galera murriztea lortu du eta sailkapenean hamargarren kokatzen da gernikarra.
Sailkapen nagusia
| 1 | Juan Pedro Lopez | 37o 52' 01" |
| 2 | Joao Pedro Goncalves Almeida | 12" |
| 3 | Romain Bardet | 14" |
| 4 | Richard Caparaz | 15" |
| 5 | Jai Hindley | 20" |
| 6 | Guillaume Martin | 28" |
| 7 | Mikel Landa Meana | 29" |
| 8 | Domenico Pozzovivo | 54" |
| 9 | Emanuel Buchmann | 1'09" |
| 10 | Pello Bilbao | 1'22" |