Aernnovako ingeniariek grebara jo dute gaur, eta lau lanuzte egingo dituzte aste honetako zein hurrengoko astearte eta ostegunetan; hau da, maiatzaren 3an, 5ean, 10ean eta 12an. Izan ere, Aernnova Engineering enpresako langileek kexu dira erosahalmenaren galerarekin eta jasaten dituzten soldata eskalekin; horri guztiari amaiera emateko hitzarmen berria exijitu diote zuzendaritzari.
Gainera, astearte honetan, Miñaoko industrialdean egindako lanuztearekin batera, SEA patronalaren egoitzaraino eraman dute protesta, eta elkarretaratze bat egin dute bertan. Greba eta mobilizazioen lehen egunaren balorazio "baikorra" egin dute sindikatuek.
Halaber, langileen ordezkariek salatu dute "lan kargaren gorakadaren aurrean, enpresa malgutasun handiagoa" eskatzen ari dela lanaldian. "Plantillan 140 pertsona zeuden, eta abusuzko ABLEEak eta kaleratzeak izan zituzten pandemiaren hasieran", gogorarazi dute.
Azkenik, enpresa batzordeak azpimarratu du Engineering Solutions enpresak hitzarmen propioa zuela, Aernnova Engineering dibisioak xurgatu eta plantilla subrogatu aurretik. "Horrela, Engineering Solutionsek bere hitzarmena galdu zuen, eta orain Aernnova Engineering Division bere lehen enpresa hitzarmena negoziatzen ari da", azaldu dute.
Apirilaren 5ean eta 7an, lau orduko lanuzteak egin zituzten. Orain, enpresaren "borondate eskasa" salatuz, mobilizazioak areagotzea erabaki dute.
