Korrikarekin batera, elurra edo elurbustia izango dira eguneko protagonistak. Prezipitazioak bereziki egunaren hasieran eta amaieran izango dira. Elur kota 200-300 metrotara egongo da; egunaren erdiko orduetan, berriz, 400-500 metro ingurura mugituko da. Iparretik joko du haizeak, bizi, eta zenbaitetan zakar. 1 eta 5 gradu arteko tenperaturak iragarri du Euskametek Gasteizerako.
Asteburuan, elurra mantenduko da, bereziki larunbatean. Egun horretako goizaldean elur kota 200-300 metro inguruan egongo da. Dena dela, elur kotak gorago joko du egunak aurrera egin ahala. Haizeak iparretik jotzen jarraituko du, bolada gogor batzuekin. Larunbatean termometroa -2 eta 3 gradu artean ibiliko da, eta -4 eta 5 gradu artean igandean.