Espainiako Gobernuko Osasun Ministerioak Covid-19aren "gripalizazioa" baieztatu du, gaitza zaintzeko eta kontrolatzeko "trantsizio" estrategia berriaren testuinguruan.
Hortaz, martxoaren 28tik aurrera positiboak isolatzeko derrigortasuna baliogabetuko du kasu arin eta sintomarik gabekoetan, esfortzuak kasu larri eta zaurgarrietan zentratzeko.
Positiboen isolamendu-epea azken hilabeteetan zehar murriztu da, eta abenduaren amaieran hamar egunekoa izatetik zazpi egunekoa izatera igaro zen. Kontaktu estuen berrogeialdiak dagoeneko ez ziren derrigorrezkoak, martxoaren 5etik. Hurrengo urratsa isolamendua bera ezabatzea izan da.
Hori bai, kutsatutako pertsonak etxean geratzera behartuta ez dauden arren, eremu guztietan maskara erabiltzea eta pertsona kalteberekin kontakturik ez izatea gomendatu die Osasun Ministerioak.
Estrategia berria itzulgarria da, eta indarrean mantenduko da adierazleak maila baxuan dauden bitartean, hau da, joera nabarmen okertzen ez bada.