Hodei gutxiago izango ditugu gaur goizean, behe hodei batzuk salbu. Alabaina, arratsaldearen amaierarako berriro etorriko zaizkigu hodeitza batzuk gainera. Haizeak hego-ekialdetik jotzen jarraituko du, baina badirudi hau ere zertxobait baretuko dela gaurkoan. Termometroetan, 4 eta 11 gradu arteko mugimenduak ikusiko ditugu.
Asteazkenaren amaieran atzemandako aldaketa hori ostegunean gauzatuko da. Goizean zehar hodeiak ugarituko dira, eta zerua oso estalita geratuko da. Euria egin dezake egun osoan zehar, baina ez espero uholde unibertsalik. Eolo jauna bere horretan geratuko da, temati, hego-ekialdetik, bolada gogor batzuekin. Tenperaturak ez dira asko mugituko, 6 eta 11 gradu artean ibiliko dira.