Dena prest da Amurrion 22. Korrikari hasiera emateko. Martxoaren 31n, egun osoan zehar izango diren ekitaldien berri eman du Amurrioko AEK-k, 16:30ean hasiko den lasterketaren aurretik izango diren saioen berri eta baita ostean ere.
Goizean goizetik, Amurrioko txistulariak eta trikitilariak izango dira herriko kaleak girotzen. 15:00etatik aurrera, Aldats elektrotxarangak hartuko ditu herriko plazak, Korrikaren hasiera heldu bitartean. 16:00etan izango da ekitaldi nagusia, eta 16:30ean hasiko da Korrika.
Arratsaldean kontzertuak
Ostean, 18:00etatik aurrera, Gozategi taldeak jarriko dio erritmoa arratsaldeari, taldearen 30. urteurrenean. 20:30ean, herriko Izate Faltsua taldearekin izango da hitzordua, eta 22:00etan Aguraingo Dupla taldearekin.
Kale animaziorik ere ez da faltako arratsaldean, Karrakan, Ugarte Otxotea eta Battuere taldeekin. Amurrio Antzokian, gainera, 17:30ean, Iratxoen kantu sekretuak korrika ikuskizunarekin gozatu ahal izango dute txikienek.