Ahoko inplantologian eta medikuntza birsortzailean egindako "lan luze eta bikainagatik", Arabako Foru Aldundiak Eduardo Anitua medikuari eman dio 2022ko Arabako Domina.
Gaur eman du erabakiaren berri foru erakundeak, astearteetako ohiko gobernu kontseiluaren ostean.
Urte hauetan guztietan Anituak erakutsitako "izaera berritzailea" nabarmendu du aldundiak, eta erantsi du Arabari "ospe handiena" eman dion pertsonetako bat izan dela. Horrez gain, egindako "dibulgazio lana" aipatu dute.
BTI Biotechnology Institute izenekoaren sortzaile eta zuzendari zientifikoa da Anitua. Horrez gain, EHUko Medikuntza Birsortzailearen eta Ahoko Inplantologiaren Unibertsitate Institutua zuzentzen du.
Anituak San Prudentzio egunean jasoko du domina, apirilaren 28an.