Teatro Paraiso antzerki talde gasteiztarraren ibilbide oparoari beste sari bat gehitu zaio gaur. Lehen haurtzarorako ikuskizun onenaren Feten saria jaso du 'Leihoak' lanak, Gijongo haurrentzako arte eszenikoen Europako azokan. Jesus Nietok idatzi eta zuzenduta, Rosa A. Garcia, Jone Amezaga eta Miren Lizeaga ditu aktore 2 eta 5 urte bitarteko haurrei eta familiakoei zuzendutako lanak.
Obra joan den azaroan estreinatu zuten Gasteizko Nazioarteko Antzerki Jaialdian. Eusko Jaurlaritza eta Arabako Foru Aldundiaren laguntza ere izan du lanak. Antzerkia talde-lana dela gogoratu du Pilar Lopez konpainiako zuzendariak, "eta honaino iritsi ahal izateko, leiho honetara begiratu ahal izateko, zortea izan dugu bultzatu gaituzten egitura eta pertsona asko izan ditugulako". Alde batetik, Mapping proiektu europarra gogoratu du, eta bestetik, bi antzoki, Gasteizko Principal Antzokia eta Teatro Circo Murcia, Leihoak sortzeko prozesuan lagundu dituztenak. "Lan konplexua" izan zen, pandemia betean garatu behar izan zutelako. "Denok gonbidatu nahi zaituztegu, txikiak zein helduak, irudimenaren eta sormenaren leiho honetara. Inoiz baino gehiago behar dugu leiho hori, giza esentziarekin topo egitera bultzatzen gaituelako, eta gogorarazten digulako aurrera jarraitzeko emozioa eta gaitasuna behar ditugula ezerezetik abiatuta etorkizun hobea eraikitzeko".