Hiru istripuk mozketak eta zazpi kilometroko ilarak eragin dituzte A-1 errepidean

Agurainen jazotako bi istripuetako bat. / Argazkia: @TESaraba

Ostegun honetan, hiru istripu jazo dira A-1 errepidean: Agurainen bi istripu gertatu dira, eta Lopidanan lau autoren arteko beste talka bat. Zazpi kilometroko auto-ilarak eta errepide mozketak izan dira Irunerako noranzkoan; une honetan, normaltasuna berreskuratzen hasi da.

Goiz mugitua gaurkoa Arabako errepideetan. Izan ere, gutxienez hiru trafiko istripu jazo dira A-1 autobidean. Lehen bi istripuak Agurainen gertatu dira, ziurrenik lainoaren eraginez: lehenengoa bi ibilgailuren arteko talka bat izan da, eta ez du zauriturik eragin; bigarrenean, ordea, bi autok eta kamioi batek talka egin dute, beste istripuak eragindako auto-ilaretan. Bigarren istripuaren ondorioz, pertsona bat zauritu da eta Txagorritxu ospitalera eraman behar izan dute.

Hasiera batean, Ertzaintzak errepidea moztu du Irunerako noranzkoan, eta ibilgailuak Gasteizko hirigunera desbideratu dituzte.

Hala ere, eguerdian ibilgailu anitzeko beste istripu bat gertatu da Lopidanan. Kasu honetan, lau ibilgailuk talka egin dute euren artean, eta, horren ondorioz, bi noranzkoetan moztu dute autobidea puntu horretan; gainera, zazpi kilometroko auto-ilarak sortu dira. Ondoren, errepidea berrireki dute Madrilerako noranzkoan, eta Irunerako noranzkoan, pixkanaka, normaltasuna berreskuratzen hasi da.

Informazioa eguneratzen ari gara.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide