Pandemiaren bilakaera ikusirik, 2022ko Arabako Bertsolari Txapelketa udaberrira atzeratzea erabaki du Arabako Bertsozale Elkarteak. "Eusko Jaurlaritzaren azaroaren 17ko agindua eta abenduaren 14ko dekretuan ezarritako araudia aztertu ondoren, 2022ko Arabako Bertsolari Txapelketa udaberrira atzeratzea erabaki du, araudi honekin eta pandemiaren egoera honetan txapelketaren helburuetako batzuk betetzea zaila delako", azaldu dute ohar batean.
Gogoratu dute, Araban bertsolaritzaren erakusleiho izateko, bertsolaritza aktibatzeko eta zabaltzeko, bertsozaleak kohesionatzeko eta berriak sortzeko helburuarekin egiten dela txapelketa, besteak beste. "Arabak txapelketa bezalako euskarazko kultur ekitaldiak behar beharrezkoak ditu, eta lanean jarraituko dugu, modu arduratsuan, ahalik eta baldintza duinenetan, bertsozale guztientzat posible izan daitezen".
Urte hasieratik apirila bitartean egitekoa zen txapelketa, beraz, udaberrira arte atzeratu dute. Data berriak aurrerago jakinaraziko dituzte.