Arzallus, Abarrategi, Perea eta Anda bideo-kopla lehiaketaren sari banaketan izango dira

Erredakzioa 2021ko aza. 16a, 19:30
2020ko bideo-kopla lehiaketaren amaiera galako bertso saioa, Jimmy Jazzen. / ALEA

Abenduaren 2an, Amets Arzallus, Peru Abarrategi, Oihane Perea eta Irati Andaren bertso saioarekin eta sari banaketarekin amaituko da Arabako bideo-kopla lehiaketa. Bideoak bidaltzeko epea azaroaren 19an amaituko da.

Azken txanpa iritsi zaio Arabako bideo-kopla lehiaketaren bigarren edizioari. Bozketa fasea ireki da, eta "bihurrikeriak" gaiaren inguruan sortutako bideo guztiak ikusgai dira ALEA.eus webguneko atal berezian

Bitartean, Gasteizko Udalak sustatutako Euskararen Astearen barruan, Arabako Bertsozale Elkarteak eta ALEAk elkarlanean antolatutako lehiaketaren amaiera galaren berri emateko ordua iritsi da. Iazko edizio arrakastatsuan bezala, ekitaldian irabazleen bertsoak ikusi eta sariak banatzeaz gain, bertso saio paregabe batekin amaituko da aurtengo lehiaketa.

Abenduaren 2an, ostegunean, 19:00etatik aurrera, Amets Arzallus, Peru Abarrategi, Oihane Perea eta Irati Anda izango dira Salburua gizarte etxean, sari banaketaren aurretik publikoa gozarazteko. Beraiekin izango dira Uxue Diaz de Zerio —gai jartzaile gisa—, Nahiara Eizagirre eta Aintzira Gorosabel —musika eta laguntza eskaintzeko—.

Ekitaldian parte hartzeko gonbidapenak doakoak dira, baina aldez aurretik eskuratu beharko dira, saioaren eguneko 17:00ak baino lehen. Saioaren egunean sarrerarik geldituko balitz, 18:40ean zabalduko da txarteldegia, aretoko ateak irekitzearekin batera.

 

Irabazleak eta sariak

Jasotako lan guztien artean, hiru sari banatuko dira: alde batetik, publikoak erabakiko du bideo-kopla onenaren saria; horrekin batera, ALEAko eta Arabako Bertsozale Elkarteko epaimahaiek lan bana aukeratuko dute.

Beraz, sarituak ugari izango dira, eta askotariko sariak izango dituzte eskuragarri:

  • Laboral Kutxaren eskutik, taldean gozatzeko Lautadan Eskape Room bat.
  • BAHK-eko izotz pistan taldean gozatzeko esperientzia talde irabazle bakoitzarentzat.
  • ELKAR-en material sortak irabazleentzat eta taldearentzat.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide