Txani Rodriguez idazleak Euskadi Literatura saria jaso du Los últimos románticos eleberriagatik. Literatura Gaztelaniaz atalean gailendu da Rodriguez. Eleberri horretan, paper fabrika batean lan egiten duen Iruneren istorioa kontatzen da, gizarteak galdu dituen balioei eusten dien emakume bat. Zaintza, elkartasuna edota ingurumenarekiko errespetua dira liburuan zehar azaltzen diren gaietako batzuk. Rodriguezen idazketa "zorrotza" nabarmendu du epaimahaiak, "xehetasunari adi", eta "erritmo narratibo bikaina" duena. "Ahots freskoa du, originala eta berezkoa", erantsi du epaimahaiak.
Saiakera Euskaraz alorrean, Alex Gurrutxagak jaso du saria, Xabier Lete, aberriaren poeta kantaria izeneko lanagatik. Gaztelaniazko Saiakeran, Mikel Reparaz aukeratu du epaimahaiak, Las grietas de América liburuagatik. Lan Literarioen Ilustrazioa atalean, berriz, Javier de Isusi saritu dute, Transparentes. Historias del exilio colombiano lanagatik.
Gaur goizean Bilboko Azkuna Zentroan egindako ekitaldian eman dituzte sarituen berri, Bingen Zupiria Kultura eta Hizkuntza Politikako sailburuaren eskutik. Sarien banaketa ofiziala, berriz, azaroaren 18an egingo dute, Artium museoan.
