Miniature Pintxos Congress biltzarra bueltan da Gasteizen, pintxoen inguruko esperientzia-proposamena egiteko helburuarekin. Urriaren 15etik 21era bitartean izango da Europa jauregian, Iradier Arenan eta, bereziki, jatetxeetan, jende orori zuzendutako jarduerekin.
"Miniature biltzarrak begirada guztien erdian jartzen du gure hiria, Gasteiz. Gure enogastronomiaren eta honen kalitatearen eta sorkuntzaren erakusleiho bikaina da eta, aldi berean, turismo erakargarri Gasteizerako. Hemengo enogastronomia helmuga turistikoaren funtsezko zutabea da, helmuga iraunkor gisa" nabarmendu du Gasteizko turismo zinegotzi Maider Etxebarriak biltzarraren aurkezpenean.
Aurtengo edizioa Miniature Social Experience jardunaldiarekin hasiko da urriaren 15ean, ostiralean, Europa jauregian. Bertan, ikusgarritasuna emango zaie sukaldaritzaren, gastronomiaren eta ostalaritzaren bidez egoera ahulean, baztertuak edo baztertuak izateko arriskuan dauden kolektiboen integrazioan eta ongizate pertsonalean ahalegintzen diren pertsona eta elkarteei. Besteak beste, El Sabor Perdido, Cocinar a Ciegas edota El Quiosco de Down ekimenak aurkeztuko dituzte.
Miniatura Kids ere izango da aurten, iaz osasun egoeragatik izandako etenaren ondoren. Europa jauregian egingo da larunbatean (hilak 16). Urriaren 17an pintxo-barra ere izango da; hogeita hamar bat tabernaren proposamenak dastatzeko aukera, Iradier Arenan.
Jardunaldi gastronomikoak
Miniature biltzarraren programa nagusia 18an hasiko da, jatetxeetako esperientzia gastronomikoekin. Horietan pintxoei eta miniaturako sukaldaritzari buruzko hitzaldi, bazkari eta afari gastronomikoak eskainiko dira. Urriaren 18an, Madrilen bizi den Luke Jang sukaldari korearrak emango dio hasiera biltzarrari, Jardines de Uleta hoteleko jatetxean, eta, gauean, Manuel Berganza gijondarra arituko da La Kobatxan. Asteartean, hilak 19, Calahorrako Lucia Gravalos sukaldari gaztea hartuko du Kea jatetxeak. Gauean, Atabaka jatetxearen paraje ikusgarrietan, Oroko Santutegian, Michelin izarra duen Valdemoroko Chiron jatetxeko Ivan Muñoz sukaldariaren hitzaldi eta miniaturako sukaldaritzako afaria izango da. Urriaren 20an, asteazkena, Gastroarte sukaldari taldeko Diego Rene malagarrak Andaluziako proposamen fresko eta sortzailea ekarriko du OtoGoieneko Borda Berri erretegira. Amaitzeko, urriaren 21ean, osteguna, pintxo-afaria, Peña Vitoria Tenis Klubeko jatetxean, eta 2021eko txapelketa eta lehiaketetako pintxorik onenak dastatzeko aukera izango da.