Arabaclik argazkigintza eta mugikorraren hirugarren topaketak aurtengo jarduera-programa aurkeztu du. Lehiaketaren aurtengo edizioan 227 egileren 796 argazki jaso dituzte guztira. Arabaclick-ek 238 argazki onenak aukeratu ditu, 90 egilerenak, eta horiekin bost erakusketa egingo dira Gasteizen urriaren 1etik 18ra bitartean.
Atariak naturarekin lotutako argazkiak hartuko ditu; Zabalganeko gizarte-etxeak, hiri paisaiarekin lotutakoak, eta Judimendiko gizarte-etxeak, argazki serieak. Amarika aretoan eta Vital Fundazioaren erakusketa aretoan, berriz, koloretako argazki urbano onenak jarriko dituzte ikusgai. "Gasteiztarrak Arabaclick 2021 ekimenak proposatutako erakusketetara joatera animatu nahiko nituzke, kameraren edo mugikorraren atzean jartzen direnek munduaz dituzten ikuspegi desberdinak ezagut ditzaten”, azaldu du Kultura zinegotzi Estibaliz Cantok. Erakusketen osagarri, bi proiektu landu dituzte: bata Arte eta Lanbide Eskolako ikasleek landu dute, eta urriaren 20an aurkeztuko dute; besteak Udalaren hezkuntza-programaren laguntza du, eta aldizkari batean argitaratuko da.