Ramiro Gonzalez diputatu nagusiak pertsona zaurgarriekin lan egiten duten langileek derrigorrez txertoa hartu beharko luketela uste du. "Berariaz txertoa hartu nahi ez duten lagunek ez lukete lan egin behar arrisku egoeran dauden pertsonekin", esan du Gonzalezek prentsa agerraldi batean. Norabide horretan, gaineratu du legez posible izan beharko litzatekeela pertsona horri "ez uztea gainerakoak kutsatzen".
Gorka Urtaran Gasteizko alkatea ere aukera horren alde azaldu da. "Diputatu nagusiaren proposamenarekin ados nago", adierazi du Euskadi Irratian. Esan du "ulertzekoa dela" txertoa jaso ez duen langile bat adineko pertsonen alboan ez egotea. Zehaztu du, ordea, ez duela argi betekizun hori jendearekin lan egiten duten langile publiko orori ezarri behar zaion.