Bigarren urtez, eta osasun egoera dela eta, ez da Zelenonen jaitsierik izango Gasteizen. Udalak Andre Maria Zuriaren plaza itxiko duela iragarria du aspalditik, jende pilaketak ekiditeko.
Ez da izango bertan behera geratuko den jarduera bakarra. Azken egunotan, aurreikusita zeuden beste zenbait ekitaldi ere ez dira egingo. Dantza Plaza ekimena edota buruhandien agerraldia izan dira horietako batzuk. Ekitaldiak debekatu izanak ezinegona sortu du, batez ere Gasteizko Txosnek egitekoa duten Herri Bazkariaren debekua. Beste zenbait kultur jarduera, berriz, bere horretan mantendu dira.
Zeledonaren ohiko jaitsiera ez egonik ere, iaz Araba osoko bizilagunek ospakizuna eraldatu zuten, eta etxe, lorategi zein plazetan ospakizun txikiekin ordezkatu zuten, familia eta lagun giroan. Zenbait lekutan Zeledon txikien jaitsiera eta guzti prestatu zuten, umeek eta helduek Zalduondoko mutikoaren alboan gozatu zezaten. Aurten ere errepikatzekoak dira Zeledon txikiaren jaitsierak lurraldean zehar. Gainera, zeruari begira, ematen du gaur euritakoa ez dela soilik atrezzo kontua izango.