MagialdiArabaren egitaraua prest dago jada. Ohi bezala, Gasteizko Magialdiaren atarikoa izango da herrietan abiatuko dutena. Abuztuaren 28tik irailaren 12ra izango da aurten. Irailaren 13tik aurrera, berriz, hiriburuak lekukoa hartuko du, egun horretan hasita eta irailaren 19ra izango baita XXXIII. Magialdia.
Jaialdiak "prestakuntza, sorkuntza eta zabalkundea" bateratuko dituela azaldu du Aldundiak, ohar batean. Jaialdiko zuzendari Jose Angel Suarezek, Ana del Val Kultura diputatuak eta Vital Fundazioko zuzendari Arantxa Ibañez de Opakuak atzo aurkeztu zuten egitaraua, Gasteizen. Azaldu zutenez, haurrentzako eta helduentzako magia lantegiak, gertuko magia animazioa eta magiari lotutako bestelako ekimenak egingo dituzte jaialdian zehar. Horietan, Hodei magoa, Tor magoa, Asier Kidam eta Imanol Ituiño arituko dira.
Zazpi urtetik gorako haurrek aukera izango dute euskarazko magia tailerretan parte hartzeko. Txandaka egingo dituzte horiek, eta gehienez hogei adingabe izango dira, 45 minutuko txandetan.
Herriz herri, hau izango da jaialdi ibiltariak egingo duen ibilbidea: Guardia (abuztuaren 28an), Agurain (29an), Done Bikendi Harana (30ean), Markiz (31n), Araia (irailaren 1ean), Maeztu (2an), Sobron (3an), Zurbao (4an), Ametzaga (5ean), Kuartango (6an), Legutio (7an), Espejo (8an), Labraza (9an), Pobes (10ean), Berantevilla (11n) eta, azkenik, Larrea (irailaren 12an).
