Ohituta daude baskoniazaleak denboraldi batetik bestera hamaika aurpegi berri ikusten, eta irailean etxeko-lanak egin beharrean izaten dira gehienak jokalarien izen berriak ikasten. Zentzu horretan ezer berririk ez datorren denboraldira begira; bost fitxaketa berri egin ditu.
Atsekabetuta zeuden zaletu asko, gainera, telebistari begira emandako denboraldian zorion ugari eskaini dizkieten Henry, Pollonara eta beste zenbaiti agur esan beharko zietenaren jakitun. Baina hori da Baskoniaren izaera, kantxan erakusten dutenetik haratago, jokalari merkeak erosi eta talde handiak etorri bitartean zain egotea besterik ez duena.
Tenore horretan, uda garai luzea espero zitekeen Zurbao aldean, baina azken egunotan ikusitakoaren arabera oporretan joan aurretik Baskoniako bulegoetan lanak bukatuta, edo erdi-bukatuta, utzi nahi izan dituzte aurtengoan. Costello pibota aurrena, Marinkovic jaurtitzailea hurrena, talde handi askok begiz jota zuten Fontecchio hegalekoa jarraian, eta, aurrekoak barneratzeko aukerarik izan aurretik, momentu honetan Europan dagoen joko-antolatzaileen artean onenetarikoa izatera iritsi daitekeen Baldin VI.aren fitxaketa iragarri zituen taldeak. Azkenik, Buesa Arena pabiloiko uztaiak ondo ezagutzen dituen Granger beteranoaren itzulera iragarri berri du taldeak. Bost jokalari arrapaladan eta, konturatu orduko, taldea goitik-behera itxuraberrituta utzi du Alfredo Salazarren idazkaritza teknikoak.
Ez dira nolanahiko fitxaketak izan gainera, eta ilusioa pizteko balio izan dutela ezin ukatu. Baliteke taldeak jarraitzaileak harmailetan biltzeko behar ekonomikoa ere izatea, eta eskaintza tentagarria egiteak eman lezake bere emaitza.
Teorian, talde sendoa osatu du Baskoniak datorren ikasturtera begira, nahiz eta seguruenik egongo den kromo trukaketaren bat denboraldia hasi aurretik. Abuztuan NBAko diruak Giedraitis preziatua ostuko dio Baskoniari, seguruenik, eta ordezkoren bat bilatu beharko du taldeak. Bestetik, Fall erraldoia etorkizuneko harribitxia izan badaiteke ere, orain arte ez du espero zitekeen mailarik eman eta Euroligako talderen batek dirua mahai gainean jarriko balu, Kerexetak ez luke arazo askorik izango atea irekita uzteko. Antzeko egoera bizi izan du Diop kapitainak azken urteetan, eta nerabe zela iritsi bazen ere, azkenean negar-malko artean utzi behar izan du bere "bizitzako taldea".
Babesle berria faltan
Jokalariekin gertatu bezala, azken urteetan elastikoan izena jartzen duen babesleen dantza ere agerikoa izan da Baskoniarentzat. Itxuraz, hainbat urtetarako akordioa sinatu zuten iaz gasteiztarrek TDSystems telebista enpresarekin, baina ordainketetan huts egiteak argudiatuta, taldeak kontratua etetea erabaki du.
Taldeak beharko du diru-iturri gehigarri hori ere, eta ariko dira honezkero jokalari berri bila.