Udako Gauak programa antolatu du aurten ere Bizan sareak (Adinekoentzako Zentro Soziokulturalak), musika eta zinema aire zabalean eskaintzeko; hiru saio izango dira orotara, uztailean eta irailean. Asteartean, hilaren 13an, hasiko dira jarduera komunitarioak, Didi Jazzek emango duen jazz-kontzertu didaktiko batekin. Vital Fundazioa Kulturunean izango da hitzordua, Dendaraban, 18:00etan.
Uztailaren 23an, berriz, zinemaren txanda izango da: Abuelos filma eskainiko dute Maurice Ravel lorategietan, Hegoalde gizarte-etxearen ondoan. Santiago Requejok zuzendutako filma da, eta aktore ezagunek hartzen dute parte: Carlos Iglesias, Ramon Barea, Roberto Alvarez eta Mercedes Sampietro.
Irailaren 17an, azkenik, beste zinema saio bat izango da kalean. Francisco Vitoria institutuko patioan (Pilar auzoan) La familia que tú eliges pelikula ikusi ahalko da. Down sindromea duen gazte baten istorioa kontatzen du; gazteak egoitzatik ihes egiten du bere ametsa lortzeko asmoz: borrokalari profesionala bihurtzea.
Hiru jarduerak (jazz-saioa eta zinema-emanaldiak) doakoak dira, eta herritar orori irekiak.