Bederatzi hilabetez luzatu dira Forondako aireportuko bidaiarien terminaleko obrak, eta 1,76 milioi euroko inbertsioa behar izan dute. Baina eraberritutako azpiegiturak argia ikusi du dagoeneko, 1980an inauguratu zenetik izandako berrikuntzarik handiena burututa. Itxura berria dute, beraz, eraikinaren barrualdeak zein kanpoaldeak, datozen urteetan aurreikusitako hazkundeari erantzuteko helburuarekin.
Espainiako Gobernuak EAEn duen ordezkari Denis Itxasok instalazioak bisitatu ditu astearte honetan. "Gasteizko aireportuak bidaiarien terminal berri bat du jada, gero eta konexio eta bidaiari gehiago hartzeko prest dagoena, mugikortasuna pixkanaka berreskuratuz. Espazio gardenak, hobeto argiztatuak, altzari moderno eta erosoak", nabarmendu du.
Bertan gogorarazi du aireportuak H-24 ordutegia duela maiatzetik, eta horri zein terminalaren eraberritzeari esker, "lehiakortasun handiagoko etorkizuna" opa dio. Halaber, Itxasoren ustez, VIAP poligonoa eraikitzeak ere negozio gaitasuna handitzea ekarriko luke: "AENAk martxan jartzeko borondatea du", ziurtatu du, tokiko agintariei dagozkien ingurumen izapideen menpe dagoela gogoraraziz.
Esku hartze nagusiak honako hauek izan dira: segurtasuna zein pasaporteak kontrolatzeko eremuak handitu dira, ekipajeak jasotzeko gela eta komunak berritu dira, argitasun handiagoa lortu da argiztapen naturalaren eta LED argien bidez, haurrentzako parkea eta atseden gelak sortu dira, eta kanpoko fatxada ere berritu da.
????El aeropuerto d Vitoria-Gasteiz cuenta ya con una nueva terminal d pasajeros lista para acoger un creciente flujo d conexiones y viajeros, con la recuperación paulatina de la movilidad. Espacios diáfanos, mejor iluminados, mobiliario moderno y cómodo.
— Denis Itxaso (@DenisItxaso) June 29, 2021
????https://t.co/kOLUg1oVFZ pic.twitter.com/BUPAUtRa1j
Zortzi helmuga
Pandemiaren bilakaeraren arabera pixkanaka mugikortasuna berreskuratzen ari den uda honetan, eskaintza zabala eta askotarikoa izango du Forondako aireportuak, Ryanair eta Binter konpainien eskutik. Asteroko zortzi helmugetatik, sei estatu mailakoak dira eta beste bi nazioartekoak:
- Ryanair (astean bi hegaldi)
- Sevilla
- Malaga (Costa del Sol)
- Alacant-Elx Miguel Hernandez
- Palma (Mallorca)
- Kolonia/Bonn (Alemania)
- Bergamo (Italia)
- Binter (astean hegaldi bakarra)
- Tenerife
- Kanaria Handia
Horrez gain, Begoña Llarena Forondako zuzendariak charter hegaldiak eta transozeanikoak laster ezartzeko aukera zabalik utzi du. "Horrelako konexioak egiteko gaitasuna duen azpiegitura daukagu, baina beste elementu bat beharrezkoa da: bidaiarien eskaria egotea, alegia", azaldu du.