Ekainaren 25etik aurrera, Alberdiren fabula doan banatuko da Euskal Herri osoko liburu dendetan eta hainbat taberna zein pasabidetan. Halaber, Whatsapp eta Telegram bidez ere zabalduko dute pasarteka, hamar egunetan zehar. Gainera, lehen aldiz egitasmoaren barruan, fabulak irrati nobela formatuko bertsio bat izango du, Thusia, creadores de ficción proiektuaren eskutik.
Lasierrako (Erriberagoitia) Azala sorkuntza guneak bultzatutako Zirriborroak eta gero proiektua kontakizun laburren bilduma da, eta hainbat idazle eta ilustratzaile gonbidatzen ditu gaur egun dauden alternatiba ekologiko, ekonomiko, kultural eta sozialetan oinarritutako utopiak irudikatzera.
Uxue Alberdi (Elgoibar, 1984) idazlearen Ibaia lana bildumaren zortzigarren alea izango da, eta Gipuzkoari eskainitako bildumako bigarrena. Fabula berri honetan, Paula Estevez komikigile eta marrazkilariaren laguntzarekin, Usurbilgo hirigintza feminista irudikatu du Alberdik:
Izan ere, Gipuzkoako udalerri horrek plan bat jarri du abian Hiri Antolamenduko Plan Orokorrean ikuspegi feminista txertatzeko. Besteak beste, segregazioa, mugikortasuna, zaintzak, saltoki txikiak eta haurren, gazteen zein adinekoen beharrak bezalako gaietan zentratu dira.