Iñaki Viñaspre Simon eta Unai Anda Delika; Manuel Bendala Garcia-Donas eta Oihane Perea Perez de Mendiola; eta, hirugarren bikotea, Martin Abarrategi Sarrionandia eta Manex Agirre Arriolabengoa. Horiek dira aurtengo Arabako Binakako Bertsolari Txapelketaren finalean bi txapelen lehian arituko diren bertsolari bikoteak. Aurkezleak Nieves Del Alamo Gil eta Eli Plazaola Zubizarreta izango dira.
Sarrerak www.bertsosarrerak.eus webgunean daude salgai.
Hemezortzi bertsolarik hasitako abentura
Abentura 2020an hasi zen, banakako txapelketarako sailkapenekin. Pandemiak, ordea, zalantzak ere ekarri zituen Arabako Bertsozale Elkartearengan. Posible izango al zen banakako Txapelketa aurrera ateratzea inor konfinatu gabe, saiorik galdu gabe. Posible izango al zen sikiera saioak egitea? Zalantza horien guztien artean, eta bertsolari zein zuzendaritza batzordearen bileretan hausnartu ondoren, binakako txapelketaren ideiak aurrera egin zuen.
Hiru final laurden eta bi finalerdi
Final laurdenak, hurrenez hurren, Izarran, Araian eta Oionen jokatu ziren. Esperientzia berria izan da bertsolarientzat, norberarengatik bakarrik ez, bikotearengatik ere ondo egiteko ardura gehitu baita bikoteen artean. Final erdietara sei bikote sailkatu ziren. Amurrion eta Gasteizen neurtu zituzten haien hitzak, Legutioko finalean aulki bat eskuratzeko.