Hemendik aurrera Diputazioko langileek hiru bizikleta elektriko izango dituzte eskura, nahi izanez gero, euren jardunari lotutako joan-etorrietan erabili ahal izateko, erakundeak gaur jakinarazi duenez.
Enplegu, Merkataritza eta Turismo saileko foru diputatu Cristina Gonzalezek dio "ingurumen jasangarritasuneko irizpideak" sartu nahi dituztela ibilgailuen flota berritzean, eta, horregatik, bizikleta elektriko horiek aukeratu dituzte. BH markakoak direla ere erantsi du.
Horrez gain, foru diputatuak aurreratu du etorkizunean auto elektriko berriak erosiko dituztela. Auto horiek "0 isuri" ingurumen bereizgarria izango dute. Horrekin batera, instituzioaren kargagailu sarea handituko dutela azaldu du. 46.200 euro bideratuko dituzte horretarako.
Dioenez, Diputazioko langileen erantzunaren arabera erabakiko dute datorren urtean bizikleta gehiago erosi ala ez. Langileek BAT txartelak ere badituztela gogorarazi du.