Aurtengo udak izango ditu Bertso Udalekuak. Egoera bilakaera luze aztertu ondoren, aurrera egitea erabaki du Bertsozale Elkarteak, eta maiatzaren 12an irekiko du Bertso Udalekuetan izena emateko epea, 10:00etan.
Maiatzaren 21era arte lehentasuna izango dute bertso-eskolako kiden diren edota gurasoetako bat elkarteko bazkide duten haurrek eta gazteek. Ondoren, baldintza horiek betetzen ez dituzten gainerako interesatuek bigarren epe bat izango dute izena emateko: maiatzaren 25etik 31ra. Izen-ematea amaituta, ekainaren 9rako emango da txanden osaketaren berri.
Zortzi txanda
Egoera kontuan hartuta, aurreko urteekin alderatuta, talde txikiagoak antolatuko dituzte eta egonaldi motzagoak: denera, zortzi txanda izango dira aurten eskainiko direnak. Sopelan, Orion, Uitzin eta Amaiurren izango dira horiek guztiak, uztailean.