2020an, Gasteizko zigor arloko epaitegiak grafitoak faltsutzearen erruduntzat jo zuen Iruña-Veleiako aztarnategiko zuzendari ohi Eliseo Gil Zubillaga. Epaileak bi urte eta hiru hilabeteko espetxe zigorra ezarri zion, eta, horrez gain, hainbat diru-zigor ere ezarri zizkion arkeologoari; guztira, 15.000 euro inguru ordaindu beharko ditu. Une honetan, Eliseo Gilek aurkeztutako babes helegitea aztertzen ari da Konstituzio Auzitegia.
SOS Iruña-Veleia, Iruña-Veleia Martxan eta Martin Ttipia elkarteek isun horiek "bidegabeak" direla salatu dute. Gainera, azaldu dutenez, duela gutxi diru-zigorra berehala ordaindu behar duela ohartarazten dion autoa jaso du Eliseo Gilek.
Sententzia "guztiz bidegabea" izan dela uste dute kanpainaren sustatzaileek, "epaiketan ez baitzen frogatu grafito bakar baten faltsutasuna ere, eta, ondorioz, are gutxiago Eliseo Gilen autoretza". Gainera, auzia "gure kultura ondarearen zein pertsona batzuen kontrako bidegabekeria" izan dela salatu dute, euren ustez, zigortutako kideen "delitu bakarra aurkikuntza harrigarri bat egitea" izan delako.
Beraz, hiru elkarteek elkartasun ekonomikorako kanpaina jarri dute martxan. Horretarako, kontu korronte bat aktibatu dute Laboral Kutxan: ES0330350056430561220095 (Unzalu-Fontanedaren izenean). Bilketaren bilakaeraren berri emango dute hiru webgunetan: Ama Ata, Iruña-Veleia Martxan eta Iruña-Veleia, gezurra ala egia.
Ohartarazi dutenez, Eliseo Gilen egoera ekonomikoa "larria" da, eta dei egin diote "gaiarekin sentibera den pertsona orori elkartasuna erakutsi diezaion eta bere ekarpentxoa egin dezan diru-zigorra ordaindu ahal izateko". Ekarpena egin nahi duten pertsonei dirua "lehenbailehen nahi duten kopurua" sartzeko eskatu diete.