Bi urtean behin, mendizaleek hitzordu garrantzitsua dute Manuel Iradier Txangolari Elkarteak 1987tik antolatzen duen Hiru Haundiak mendi lasterketarekin. 2020ko urriaren 17an egitekoa zen edizioa bertan behera geratu zen pandemiaren ondorioz, baina dagoeneko ofiziala da: 2021ko urriaren 9an itzuliko da Gorbeia, Anboto eta Aizkorri mendietako tontorretara.
Lasterketaren sustatzaileek iragarri dutenez, aire zabaleko kirol ekitaldi bat antolatzeko beharrezkoak diren segurtasun neurri guztiak hartuko dituzte: irteera mailakatua izango da, lasterketan distantzia soziala bermatuko da eta jende pilaketak sortzen diren puntuetan maskara erabili beharko da, besteak beste.
XXII. edizioaren data berria hurbildu ahala, antolatzaileek lasterketaren xehetasun gehiago ezagutaraziko dituzte. Gainera, maiatzaren 10ean izena emateko prozeduraren inguruko informazioa plazaratuko dute. Izan ere, 2020ko zerrendak mantenduko dira, baina bajak egonez gero, itxaron-zerrendetako jende gehiagok eman ahalko du izena.