Arabako Foru Aldundiak 1.320.000 eurorekin lagunduko ditu nekazaritza ekologikoan inbertitzen duten ustiategiak. Nekazaritza-ingurumeneko eta klimako konpromisoak borondatez sinatzen dituzten nekazariei eta nekazarien elkarteei zuzenduko da dirulaguntza. "Funtsean, biodibertsitatea, balio natural handiko nekazaritza-sistemak eta Europako paisaien egoera lehengoratu, zaindu eta hobetu behar dira, nekazaritza-lurzorua, ura eta haren mendeko ekosistemak eta paisaiak zaindu eta hobetzen lagunduz. Nekazaritza sistema tradizionalei eusteak, ingurumen-interes handia izateaz gain, lurralde-oreka mantentzen laguntzen du, ehun sozioekonomiko biziari eta landa-komunitate bideragarriari eutsiz".
Halaber, modu horretan, nekazaritza jarduera bertan behera uztea geldiarazi nahi du Aldundiak, jarduera desagertzeko arrisku handia duten eremuetan eraginez. Helburua da ekoizpen-sistema jasangarriagoak sustatzea, klima-aldaketa, berotegi-efektuko gasen isurketa gutxitzea, animalien ongizatea eta elikagaien segurtasuna arintzen lagunduz.
2015-2020 aldirako Euskadiko Landa Garapenerako Programaren barruan dago dirulaguntza. Gobernu Kontseiluak gaur onartu dituen laguntza horien % 75 LGENF funtsen bidez finantzatzen dira.
Iaz, 294 pertsona izan ziren onuradunak, 50 ekoizpen integratura bideratu ziren, 115 tokiko animalia-arrazak kontserbatzera, 15 biodibertsitatea hobetzeko erlezaintzara, 2 mendiko larreen aprobetxamendua kudeatzera, 34 nekazaritza ekologikora eta 78 nekazaritza ekologikoari eustera.