2015ean, Administrazio Prozedurari buruzko Legea onartu zen, administrazio elektronikoa ezartzeko metodoak eta epeak zehazteko. Ordutik, hainbat luzapen izan dira prozesuan, eta, azkenik, 2021eko apirilaren 2a baino lehen administrazio publiko guztiek erregistro elektroniko orokor bat izan beharko zutela erabaki zen. Hori posible ez zen kasuetan, beste plataforma edo erregistro batzuetara atxikitzeko aukera zegoen.
Gaur egun, Arabako 355 kontzejuentzat ezinezkoa da lege hori betetzea, eta, egoerari irtenbide bat emateko helburuarekin, EH Bilduk mozio bat aurkeztu du Lurralde Orekako hurrengo Batzordean eztabaidatzeko. "Duen tamainagatik eta jarduteko ohiko moduagatik, ezinezkoa da administrazio elektronikoa ezartzea, izan ere, gehienetan ez dute ezta webgunerik ere", azaldu du EH Bilduko Javier Argotek
Mozioaren bitartez, EH Bilduk Arabako Foru Aldundiari eskatu dio Arabako kontzejuei administrazio elektronikoa ezartzeko behar diren baliabideak eman diezazkiela. "Aldundiak baliabideak eman behar dizkie toki-erakunde horiei gure lurraldearen digitalizazioan aurrera egiteko, baita Arabako landa eremuan ere", defendatu du Argotek.