Gorka Urtaran Gasteizko alkatea, Ramiro Gonzalez Arabako diputatu nagusia eta Pedro Elosegi Arabako Batzar Nagusien lehendakaria izan dira buru erakundeek gaur goizean egindako omenaldian. Udalak 2018an ezarri zuen Frankismoaren Biktimen Oroitzapen eta Aitorpeneko Eguna.
Ekitaldian Maider Etxebarria, Ana Oregi eta Iñaki Gurtubai alkateordeek, Ana Agirre Justizia sailburuordeak eta udaleko alderdi politiko guztietako bozeramaile eta ordezkariek ere hartu dute parte. Bertan, 1931 eta 1936 urteen artean hiriko alkate izandako Teodoro Gonzalez de Zarate gogoratu dute; izan ere, 1937ko martxoaren 31n fusilatu zuten tropa frankistek Azazetako mendatean, altxamenduaren aurkako alderdietako beste 15 pertsonarekin batera. Horien artean, Juan Francisco Diaz de Arkaia Gasteizko zinegotzi sozialista.
Aitorpen-ekitaldia Posta kalearen eta Agirre Lehendakariaren kalearen arteko bidegurutzean egin da, Isiltasunean Oihuka eskulturaren ondoan, errepresio frankistaren eta diktaduraren biktima guztiak ohoratzen dituena.