Araban ezarri nahi dituzten lau parke eolikoen kokapena proposatzerakoan, lurralde plana ez izatea leporatu dio EQUOk Jaurlaritzari.
Alderdiak prentsa ohar batean argitu duenez, asteazken honetan argitaratu dute Euskal Herriko Agintaritzaren Aldizkarian Arantxa Tapia ingurumen sailburuaren agindu bat, eta bertan zera eskatzen zaio Jaurlaritzari: energia berriztagarrien lurraldearen arloko plana martxan jartzea, energia berriztagarrietarako kokalekurik aproposenak zehazteko.
Halere, iazko abenduan aurkeztu zituen Aixendar sozietateak Araban lau parke eoliko jartzeko eskaerak, "plan horren planifikazioa eta ebaluazioa eskura eskura eduki gabe", alderdiaren hitzetan. Diotenez, Energiaren Euskal Erakundeak ez zukeen kokalekurik hautatzen hasi behar plan hori eskutan izan arte.
"Ez dakite kokaleku horiek betetzen ote dituzten Lurraldearen Arloko Planean ezarriko diren lege eta ingurumen betekizunak, baina ezerk ere ez ditu geldiarazten, eta korrika hasi dira proiektuak izapidetzeko lanekin", dio alderdiko eledun Joserra Becerrak. "Agerian geratu da Eusko Jaurlaritzak gure lurraldeko ondare kultural, historiko eta naturalaren kontserbazioarekiko duen errespetu eta konpromiso eskasa".
EQUOk aurreratu du udaletan mozioak aurkeztuko dituela, lurralde plan horren tramitazioa osatu arte proiektuen tramitazioa gelditzeko eskatuz.