Arabako Foru Aldundiak energia berriztagarrien aldeko trantsizioa egiteko hainbat motatako ekintzak lagunduko ditu lurraldeko udalerrietan eta kontzejuetan. Dirulaguntza 164.000 eurokoa izango da guztira; 44.000 euro aurtengo ekitaldirako, eta gainerako 120.000 euroak 2022. urterako. Laguntzen zenbatekoa gehienez 75.000 eurokoa izan daiteke proiektu bakoitzeko.
Aldundiaren babes ekonomikoa energia berriztagarrien aprobetxamendurako instalazioak eta ekipamendua sortzeko bideratuko da, bai aprobetxamendu termikoko sistemak bai elektrizitatea sortzekoak ere: eguzki energia termikoa, energia fotovoltaikoa, minieolikoa, biomasa, geotermia eta minihidraulikoa. Gainera, inbertsioak jasotzeko aukera izango dute udalerriek eta kontzejuek instalazio horien bideragarritasunaren azterketak egiteko eta proiek- tu teknikoak idazteko. Bestalde, laguntzak emango dira ibilgailu elektrikoak erosteko, betiere erakunde publikoen titulartasunekoak eta horien erabilerarako baldin badira. Horren harira, dirulaguntzak aurreikusi dira, baita ere, halako ibilgailuen kargaguneak herrietan instalatzeko.
Trantsizio energetikoan laguntzeko aurrekontuan sartzen dira ere bestelako gastuak: eguzki argiztapenerako ekipamenduak, monitorizazio ekipoak, ordutegia programatzeko gailuak eta kontsumitutako energia benetako eskarira egokitzeko bitartekoak.
Bigarren atal batean, eraikin eta ekipamenduen inbentario energetikoak, parke mugikorren eta argiteria publikoen instalazioak, kontsumoen kontrola, ikuskaritzak eta eraginkortasun ziurtagiriak, eta ekintza energetikoen proiektuak eta mugikortasuneko planak lagunduko dituzte.