Espetxe Zaintzako epaileak hirugarren gradua eman eta hilabetera, Iñaki Urdangarin Zaballako espetxera joango da. Espetxe Erakundeetako Idazkaritza Nagusiak Arabako espetxera lekualdatzea onartu dio datorren astetik aurrera.
Bere ama, Claire Liebaert, Gasteizen bizi da, eta berarekin igaroko ditu asteburuak. Izan ere, Urdangarinek asteburu libreak izango ditu, astean zehar espetxera itzuliko da lo egitera, eta goizetan aterako da topatu duen lan berri batean lan egitera. Gainera, abian jartzen denean, gaizkile ekonomikoentzako tratamendu-programaren mende jarriko da.
Iñaki Urdangarin 2018ko ekainean espetxeratu zuten Brievako emakumeen kartzelan, ustelkeriagatik bost urte eta hamar hilabeteko zigorra betetzeko, Noos auzia dela eta. Urtarriletik, Alcala de Henaresko Gizarteratze Zentroan betetzen ari da zigorra, hirugarren graduan.