Arabako egoitzetako langileek bi urte daramatzate lurraldeko hitzarmen duin baten alde borrokatzen. Urtarrilaren 11n, hainbat enpresak langileen ordezkariekin biltzeko gonbidapena onartu zuten, balizko hitzarmenari buruz hitz egiteko.
ELA, LAB, UGT eta CCOO sindikatuek osatutako langileen ordezkaritzak azaldu duenez, bilera horretara ez ziren joan deituta zeuden egoitza guztietako ordezkariak; zazpi deitu zituzten —Albertia, Agure, Tagore, Iruña, Gorbea, Orobide eta Lorea—, baina soilik lau bertaratu ziren.
Hala ere, sindikatuek azaldu dutenez, bertaratutako enpresek onartu zuten probintzia mailako hitzarmenaren beharra. Gaur egun, ordea, Arabako egoitzen patronala osatu gabe dago; eta horixe da, hain zuzen ere, sindikatuen eskakizun nagusietako bat, modu antolatu batean negoziatu ahal izateko.
Bitartean, enpresek adierazi dute ez dituztela elkarrizketak hasiko "Aldundia hitzarmenaren negoziazioaren parte aktiboa ez den bitartean".
Testuinguru horretan, protestekin jarraitzeko erabakia hartu dute, eta bi greba egun deitu dituzte epe motzean. Lehenengo hitzordua asteazken honetan izan dute, eta Gasteizko udaletxetik Aldundiak Probintzia plazan duen egoitzaraino eraman dute protesta. Nobedaderik ez badago, martxoaren 24rako ere greba deitu dute.