Aernnovako langileek enpresak onarturiko lan erregulazio espedientearen kontra borrokatzen jarraituko dute. Hala, enpresa batzordeak espedientearen aurkako helegitea aurkeztu du EAEko Auzitegi Nagusian. Aernnova berarekin batera "gainjarritako enpresak eta sozietateak" ere salatu dituzte. Enpresak kaleratzeak oinarritzeko aipatu dituen produkzio "arazoak" egiturazkoak ez direla nabarmendu dute berriro ere langileek, eta osasun krisiak eragindako arazo "koiunturalak" besterik ez direla berretsi dute.
Izan ere, enpresa "iruzurra" egin nahi duela aipatu du enpresa batzordeak helegitean, eta aldi baterako neurriak, ERTEak kasu, aski direla enpresaren bideragarritasuna bermatzeko. Halaber, langileek salatu dute produkzioaren inguruan beharrezko azalpenak ematea saihestu duela Aernnovak, eta halaber "informazioa ezkutatu" duela. "Bere erabakia justifikatzeko txosten partzialak erabili ditu eta desokupazio-orduak kalkulatzeko gehiegizko kalkuluak aurkeztu ditu".