Zerbitzu sozialen sistema eta kudeaketa «publiko, unibertsal, doako eta kalitatezkoa» aldarrikatu dute astearte honetan, urtarrilaren 26an, deitutako zaintza grebaren lehen jardunaldian. Gasteizen, 11:30ean abiatu da sindikatu guztien manifestazio bateratua, Andre Maria Zuriaren plazatik.
Hala ere, sindikatu bakoitzak bere deialdi propioa egin du grebarako, eta mobilizazio nagusietan bat egin aurretik, zutabeak egin dituzte, bakoitzak bere aldetik. LAB, ELA, CCOO, UGT eta ESK sindikatuek deitu dute greba, baina SATSE eta CNT sindikatuek ere babesa eman diote deialdiari; baita pentsiodunen mugimenduak ere, besteak beste.
EAEn zaintza lanetan ari diren langile guztiak zeuden grebara deituta; besteak beste, adinekoen egoitzetan, etxeko laguntzan, eguneko zentroetan, aniztasun funtzionalean, esku-hartze sozialean, hezkuntza aisialdian, animazio soziokulturalean, telelaguntzan eta gaixotasun mentalean lan egiten duten pertsonak.
«Zaintza lanen duintasuna» aldarrikatu dute kaleetan, lan prekarietatea salatuz eta kalitatezko sektore publikoa exijituz. «Urtarrilaren 26ko eta martxoaren 4ko grebek inflexio-puntu bat gehiago izan behar dute zaintza funtzioa aitortzeko borroka kolektiboan, kalitatezko zaintzak jasotzeko eskubidean», adierazi du LAB sindikatuak.